बिनोद ढकालको प्रतिवद्धता सार्वजनिकरण
विराटनगर, ३ फाल्गुन । आसन्न प्रतिनिधिसभा सदस्य निर्वाचनमा नेकपा (एमाले) का तर्फबाट मोरङ क्षेत्र नं. ६ मा प्रत्यक्ष तर्फका उम्मेदवार बन्नुभएका विनोद ढकालले पितृशोकमा कोरामा बसेकै बेला आफ्नो प्रतिवद्धता सार्वजनिकगर्नुभएकोछ ।
ढकाल कोरामा बस्नुभएको घर विराटनगर ५, सम्झना चोकमा आज ढकालको उपस्थितिमा मोरङ क्षेत्र नं. ६ क्षेत्रीय निर्वाचन संयोजन समितिका सचिव सत्यनारायण चौधरीले सञ्चारकर्मीमाझ प्रतिवद्धता पत्र वाचन गरेर सुनाउनुभएको हो ।
सार्वजनिक गरिएका प्रतिवद्धतामा कानुन निर्माणको मुख्य अभिभाराका अलावा विराटनगर महानगर क्षेत्र भित्रको डुवानको सममस्या समाधानको गुरुयोजनादेखि विभिन्न क्षेत्रमा विकास निर्माण र कृषि क्षेत्रका समस्या समाधान तथा विपन्न समुदायको उत्थानका कामलाई प्राथमिकता दिइएको छ ।
३० बुँदे प्रतिवद्धता पत्रमा यसअघि सोही क्षेत्रबाट निर्वाचित एमाले नेता लालबाबु पण्डितले प्रारम्भ गरेर बाँकी रहेका परियोजना पूरा गर्ने समेत उल्लेख गरिएको छ ।
हेर्नुहोस ढकालका प्रतिवद्धताः
१. विराटनगरको ढल निकास र डुबान समस्या समाधान गर्न गुरुयोजना बनाई लागू गर्ने ।
२. चक्रपथसहितको प्रमुख सडक स्तरोन्नति गरी कालोपत्रे बनाउने ।
३. गछिया, बुढीखोला–केशलिया र सिंघिया नदीबाट हुने डुबान नियन्त्रण गर्न विशेष योजना ल्याउने ।
४. बन्द भएका र रुग्ण उद्योगलाई पुनः सञ्चालनमा ल्याउन पहल गर्दै मजदुरको हितमा विशेष कार्यक्रम ल्याउने र साना तथा घरेलु उद्योगको प्रवद्र्धन गर्ने ।
५. गुणस्तरीय विद्यालय शिक्षा र ‘स्मार्ट क्लास रुम’ को नीति लागू गर्न पहल गर्ने ।
६. जेन–जी उमेर समूहलाई आधुनिक प्रविधिमार्फत नवप्रवद्र्धनात्मक सिकाई र उच्च शिक्षाका विद्यार्थीका लागि ‘पढ्दै, कमाउँदै’ कार्यक्रम लागू गर्ने ।
७. विश्वविद्यालय र क्याम्पसहरूलाई व्यवस्थित गरी स्वरोजगार मूलक शिक्षा लागू गर्ने र विशेष छात्रवृत्ति कार्यक्रम ल्याउने ।
८. मदरसा र गुरुकुलसहित धार्मिक विद्यालयलाई सुव्यवस्था र सुविधा वृद्धि गरी विश्वविद्यालयको शैक्षिक कार्यक्रमसँग जोड्ने ।
९. मठमन्दिर, मस्जिद, चर्च, गुम्बा, थान आदि सांस्कृतिक धरोहरहरूको संम्बद्र्धन गर्ने ।
१०. थारु समुदायको भाषा, संस्कृति, चाडपर्व र रीतिरिवाजको संरक्षण गर्दै समय अनुसारको विकास गर्ने ।
११. सरकारी तथा निजी अस्पतालमा यस क्षेत्रका विपन्न तथा गरिब नागरिकको सहज पहुँच बनाउने ।
१२. मल, खाद तथा बीउ समयमै उपलब्ध गराउने व्यवस्था गर्दै कृषि सिँचाइको प्रबन्ध र अग्र्यानिक कृषिलाई व्यवसायीकरण गर्ने ।
१३. कृषि उपज संकलन केन्द्र र शीत भण्डार सञ्चालन गर्न प्रोत्साहित गर्ने ।
१४. सुन्दरहरैंचाको छ पोखरी, बुढीगंगा नजिकै सिंघिया खोलामा र बौराहाको मधुपार्कसहित अन्य पार्कहरूको स्थापना र प्रवद्र्धन गर्ने तथा हसिना सिमसारलाई पर्यटकीय क्षेत्र बनाउने ।
१५. कोशी नहरको विराटनगर शाखा कोरिडोर, गछिया र बुढीखोलामा एकातर्फ सडक र अर्को किनारालाई सुन्दर र हरियाली बनाउने । खुला व्यायामशाला र मिनिपार्क स्थापना गर्ने ।
१६. निर्वाचन क्षेत्र स्तरीय रंगशाला, आवश्यकता अनुसार खेल मैदान र कबर्ड हल बनाउँदै युवालाई खेल र रचनात्मक कार्यमा प्रोत्साहित गर्ने तथा लागू औषध दुव्र्यसनीविरुद्ध सचेतना जगाउने ।
१७. नवप्रवर्तनलाई प्रोत्साहित गर्ने, युवा उद्यमीलाई बिना धितो ऋणको व्यवस्था मिलाउन पहल गर्ने । र, नवयुवालाई स्वरोजगार मूलक तालिममार्फत उद्यमशीलता विकास गर्ने ।
१८. ज्येष्ठ नागरिक, अपाङ्गता भएका, दलित र एकल महिलाको सामाजिक सुरक्षा भत्ता बढाउन पहल गर्ने ।
१९. अव्यवस्थित बसोबासी र सुकुम्वासी समस्या सम्बोधन गर्ने ।
२०. विपन्न परिवारकालागि निःशुल्क विद्युतीय चुल्हो कार्यक्रम सञ्चालनमा पहल गर्ने ।
२१. चारकोसे जंगल क्षेत्रमा हात्तीको र हातीमूढामा बाँदरको आतंक नियन्त्रण गर्न पहल गर्ने ।
२२. सहकारी र माइक्रोफाइनान्सको चर्को व्याजबाट विपन्न नागरिकलाई राहत दिने ।
२३. सिटी रिक्सा चालकलाई संगठित गरी सहुलियत दरमा चार्जिङ सुविधा उपलब्ध गराउने ।
२४. उत्तरी मोरङको गछियालाई केन्द्र बनाई प्रशासनिक कार्यालयहरू स्थापना गर्न पहल गर्ने ।
२५. विगतमा यही क्षेत्रबाट निर्वाचित लालबाबु पण्डितले सुरु गरी अधुरो रहेका परियोजनाहरूलाई प्राथमिकताका साथ पूरा गर्ने ।
२६. पूर्वाञ्चल विश्वविद्यालयबाट हसिना सिमसार जाने पर्यटन मार्ग (सुन्दरहरैंचा ६ र ७ जोड्ने) र गछिया र गोठगाउँलाई (वडा नंं ३ र ४ लाई) जोड्ने पक्की पुल निर्माण गर्ने ।
२७. कोडिया चोक पश्चिम सुकचर खेल मैदान छेउ बुढी खोलमा पक्की पुल निर्माण गर्ने ।
२८. गछिया आधारभूत प्रा.वि.देखि पूर्व (वडा नं. ६ र ७ लाई जोड्ने) झोलुङ्गे पुल निर्माण गर्ने ।
२९. नेताचोकबाट खनार हुँदै भाइरल पुल जाने नहर किनारको सडकमा कालोपत्रे गर्ने ।
३०. मिलनचोक–कमलपुर–जोगियारे हुँदै मृगौलिया जाने भूवनेश्वर सडक चौडा गरी कालोपत्रे गर्ने ।
प्रतिवद्धता सार्वजनिक कार्यक्रममा नेकपा एमालेका पूर्व स्थायी कमिटी सदस्य लालबाबु पण्डितले घरदैलो कार्यक्रममा ढकालको अनुपस्थितिमा यस क्षेत्रका अन्य नेताहरुबाट निरन्तर चल्ने बताउनुभयो । सञ्चारकर्मीहरुको जिज्ञासामा उहाँले नेकपा एमालेमा अहिले कुनै ध्रुविकरण नरहेको भन्दै एक ढिक्का भएर निर्वाचनमा होमिने बताउनुभयो ।
कार्यक्रममा नेकपा एमालेका पूर्व उपाध्यक्ष तथा समानुपातिक उम्मेदवार गुरु बराल, नेकपा एमालेका केन्द्रीय सदस्य तथा मोरङ जिल्ला ईन्चार्ज ऋषिकेश पोखरेल, केन्द्रीय सदस्य पर्शुराम बस्नेत तथा नेकपा एमालेका प्रदेश तथा जिल्ला कमिटीका नेताहरुको उपस्थिती थियो ।
