आर्थिक समृद्धि र रोजगारी सिर्जना सरकारको पहिलो प्राथमिकता हुनुपर्छ - वरिष्ठ उपाध्यक्ष वैद्य

झापा, असार १४ गते। नेपाल उद्योग वाणिज्य महासंघका वरिष्ठ उपाध्यक्ष सुरकृष्ण वैद्यले सरकारले आर्थिक समृद्धिलाई केन्द्रमा राखेर काम गर्नुपर्ने बताएका छन् ।

मुलुकमा लामो समयपछि स्थायी सरकार बनेको उल्लेख गर्दै उनले स्थायित्वलाई समृद्धिसँग जोड्न सकिए मात्र जनअपेक्षा पूरा हुने धारणा राखे ।  

बिर्तामोड उद्योग वाणिज्य संघको आठौं वार्षिक साधारण सभालाई सम्बोधन गर्दै वैद्यले व्यवसायीलाई समेटेर अघि बढ्न सके सरकार सफल हुने बताए । आर्थिक गतिविधि विस्तार, लगानी प्रवद्र्धन र निजी क्षेत्रसँग सहकार्यलाई प्राथमिकतामा राख्नुपर्ने उनको भनाइ थियो ।

उनले सरकारको पहिलो दायित्व आर्थिक समृद्धि हासिल गर्नु, युवालाई  विदेश पलायन रोक्नु र स्वदेशमै रोजगारी सिर्जना गर्नु रहेको उल्लेख   गरे । त्यसका लागि व्यवसायीलाई लगानीमैत्री वातावरण उपलब्ध गराउन आवश्यक रहेको उनको धारणा थियो ।

“व्यवसायी स्वच्छ र पारदर्शी ढंगले काम गर्न चाहन्छन् । त्यसका लागि अनावश्यक झन्झट र अवरोध हटाइनुपर्छ,” उनले भने ।

वैद्यले मुलुकको अर्थतन्त्रलाई चलायमान बनाउन विकास निर्माणमा पूँजीगत खर्च वृद्धि, सुशासनको प्रत्याभूति र निजी क्षेत्रप्रति विश्वासको वातावरण निर्माणमा सरकारले ध्यान दिनुपर्ने सुझाव दिए ।

संघका अध्यक्ष राजु न्यौपानेको अध्यक्षता तथा वैद्यको प्रमुख आतिथ्यमा सम्पन्न कार्यक्रममा महासंघका केन्द्रीय उपाध्यक्षहरू कृष्णप्रसाद शर्मा, दिल सुन्दर श्रेष्ठ, नरेश लाल श्रेष्ठ, प्रवलजंघ पाण्डे, केन्द्रीय सदस्य दिपक नेपाल, अर्जुन कुमार श्रेष्ठ र नवीन रिजाल लगायतको उपस्थिति थियो । 

कार्यक्रममा पूर्वअध्यक्ष तथा संविधान सभा सदस्य सुधीरकुमार सिवाकोटी, संघका पूर्वअध्यक्ष वलराम कार्की तथा झापाका सहायक प्रमुख जिल्ला अधिकारी अञ्जन न्यौपानेले शुभकामना मन्तव्य राखेका थिए ।

संघका वरिष्ठ उपाध्यक्ष राजकुमार घिमिरे राजुले स्वागत मन्तव्य राखेको कार्यक्रममा अध्यक्ष न्यौपानेले उद्योगी–व्यवसायीको हितमा संघ निरन्तर क्रियाशील रहेको बताए । उनको कार्यकालमा सम्पन्न गतिविधिसम्बन्धी श्रव्यदृश्य सामग्री समेत प्रस्तुत गरिएको थियो ।

संघका महासचिव कुशल खतिवडाले सञ्चालन गरेको कार्यक्रममा दुई व्यवसायी र दुई पत्रकारलाई सम्मान गरिएको थियो । सम्मानित हुने व्यवसायीमा चान मोहम्मद र उमाकान्त ढुङ्गेल रहेका थिए । मोहम्द लामो समयसम्म वैदेशिक रोजगारीमा रहेर स्वदेश फर्किएर व्यवसाय क्षेत्रमा काम गर्दै आएको र रोजगारीको वातावरण सृजना गरेको भन्दै उनलाई सम्मान गरिएको थियो । 

उनले बिर्तामोडमा एभरेष्ट फ्रेस एण्ड फेसन मार्ट सञ्चालन गर्दै आएका छन् । त्यस्तै ढुङ्गेल बिर्तामोडका पुराना व्यवसायी हुन् । उनी माँ दुर्गा ट्रेडसका सञ्चालक   हुन् । 

त्यस्तै, वर्ष उत्कृष्ट सञ्चारकर्मीका रूपमा प्रतिदिन दैनिकका सम्पादक इन्द्रसिंह राजवंशी र अच्युत सुवेदीलाई नगदसहित पुरस्कृत गरिएको थियो ।