बाख्रापालक किसानसँग बजार जोड्दै समृद्धि आयोजना

ओखलढुंगा माघ ६ गते । रातो तारा डट कम, ओखलढुंगाका बाख्रापालक किसान बजारसँग जोडिन थालेका छन् । ग्रामीण उद्यम तथा विप्रेषण आयोजना ९समृद्धि० ले बाख्रापालक किसान र व्यापारीबीच छलफल चलाउन थालेपछि उत्पादक समूह सोझै बजारसँग जोडिन थालेका हुन् ।

जिल्लाको सिद्धिचरण नगरपालिका, मोलुङ र चिशंखुगढी गाउँपालिकामा रहेका ११ वटा बाख्रापालक किसान समूहमा समृद्धिले काम गरिरहेको    छ । सबै समूहमा किसान र व्यापारीबीच सम्बन्ध विकास गरेर बजार जोड्ने काम भइरहेको समृद्धि आयोजनाका आपूर्ति श्रृंखला सुपरीवेक्षक नवराज कार्कीले जानकारी दिनुभयो । कार्यक्रमको प्रभावका कारण ओखलढुंगा सदरमुकाम र काठमाडौँमा कारोबार गर्ने जिल्लाका मुख्य व्यापारीसँग किसान समूहले सोझै पहुँच राख्न थालेका छन् ।

समृद्धि आयोजनाले किसान समूहलाई बजारसँग जोड्न थालेपछि किसानहरु सामुहिक बजारीकरण गरेर उत्पादित खसीबोका बिक्री गर्ने परम्पराको अभ्यास गर्न उत्साहित देखिएका छन् । सामुहिक रुपमा खसीबोका संकलन गरेर बिक्री गर्दा खसीबोका व्यापारीले मूल्य बढी दिने अवस्था देखिएको सिद्धिचरण नगरपालिका १ तलुवाको मैतदेवी बाख्रापालक किसान समूहका अध्यक्ष हर्कबहादुर घिमिरेले जानकारी दिनुभयो ।

हेरेकै भरमा मोलमोलाइ गर्दा बाख्रापालक किसान ठगिने समस्या समाधान गर्न समृद्धिले जिउँदै खसीबोका जोखेर किनबेच गर्ने चलन पनि जिल्लामा सुरुवात गरिसकेको छ । समृद्धिको अगुवाईमा जिल्लामा २ वर्षअघि सिद्धिचरण नगरपालिका १० बेतिनीमा रहेको नमुना बाख्रापालक किसान समूहबाट जिउँदै जोखेर किनबेच सुरु भएको थियो । अहिले त्यसको प्रभाव जिल्लाभर देखिएको उक्त समूहका अध्यक्ष घनश्याम बाँस्तोलाले बताउनुभयो ।

आयोजनाले जिल्लामा तरकारीका क्षेत्रमा पनि काम गरिरहेको छ । तरकारीलाई पनि बजार जोड्ने काम भइरहेको समृद्धि आयोजनाले जनाएको छ ।