अव प्रोत्साहन भत्ता रोकिदै,

काठमाण्डौ बैशाख १२ गते । रातो तारा डट कम,सरकारी निकायका कर्मचारीलाई प्रदान गर्दै आएको तलबको ५० देखि शतप्रतिशतसम्मको प्रोत्साहन भत्ता रोकिदै छ । बन्दाबन्दीका कारण अत्यावश्यकबाहेक अरू कार्यालय र काम बन्द भएकाले २० हजारभन्दा बढी कर्मचारीले पाउँदै आएको प्रोत्साहन भत्ता रोकिने भएको कुरा अर्थ मन्त्रालयले जनाएको छ । सरकारले औपचारिक रूपमा कर्मचारीहरूलाई बन्दाबन्दीभर प्रोत्साहन भत्ता नदिने या रोक्ने  निर्णय भने गरेको छैन । धेरैजसो कार्यालय बन्द रहेको र कामसमेत बन्द रहेका कारण कर्मचारी कसैलाई पनि चैत महिनाको प्रोत्साहन भत्ता नदिइएको र बन्दाबन्दी रहेसम्म नदिइने अर्थ मन्त्रालयले जनाएको हो । कर्मचारीलाई प्रोत्साहन भत्ता दिने निकायमा राष्ट्रपति कार्यालय, उपराष्ट्रपति कार्यालय, प्रधानमन्त्री तथा मन्त्रिपरिषद कार्यालय, सार्वजनिक खरिद अनुगमन कार्यालय, सतर्कता केन्द्र, अख्तियार र महालेखा परिक्षकको कार्यालयसहित सबै संवैधानिक निकाय, भन्सार तथा आन्तरिक राजस्व कार्यालय लगायतका रहेका छन् ।