बेल्टार बजारका ब्यापारीहरुले शुक्रबार सडकमा फोहोर फ्याकेर बिरोध गरे

श्याम राई, उदयपुर गाईघाट, १८ जेष्ठ | बेल्टार बजारका ब्यापारीहरुले शुक्रबार सडकमा फोहोर फ्याकेर बिरोध जनाएकाछन् ।

चौढण्डीगढी नगरपालिकाले फोहोर ब्याबस्थापनमा उदासीन देखाएको भन्दै उनीहरुले बिच बजारमा फोहोर फ्याकेर बिरोध गरेका हुन ।

बजार क्षेत्रको फोहोर उठाउन सफाई कर्मचारी नियमित नआउने, लामो समय सम्म बजारमा फोहोर थुप्रिएर दुर्गन्ध हुँदा समेत नगरपालिकाले बेवास्ता गरेको बिरोधमा आफूहरुले फोहोर सडकमा फ्याकेर बिरोध गरेको उनीहरुको भनाई छ ।

बजारको फोहोर ब्यबस्थापनको लागि सर्बदलिय, सर्बपक्षिय भेलाबाट फोहोर प्रभाबकारी ढंगले उठाउने मेयर कालु लामाले गरेको प्रतिबद्धता पूरा नभएको ब्यापारी केशब खड्काले बताए । उनले प्रतिबद्धता पूरा नगरेको कारण आज फोहोर सडकमा फ्याकेर बिरोध गर्नु परेको उनले बताए ।

मेयर लामाले भने फोहोर ब्यबस्थापनको काम नियमित रुपमा भैरहेको बताए । सफाई कर्मचारीको संख्या कम हुदा कहिले काही बजारको फोहोर उठाउन ढिलो हुन गएको उनले बताए । अब अर्को आर्थिक बर्षमा बजेट ब्यावस्थापन गरेर सफाई कर्मचारी थप गर्ने तयारी भैरहेको उनले बताए ।