अघोषित तथा अनियमित विद्यूत आपूर्ति विरुद्ध संघको अपिल

बिराटनगर २०८१ जेठ १८ गते | नेपालका सबै जसो औद्योगिक कोरिडोरका उद्योगहरुले विगत केहि महिना देखि खेप्नु परिरहेको अघोषित तथा अनियमित विद्यूत कटौतिका वावजूद नेपाल विद्यूत प्राधिकरणले भारतलाई विद्यूत निर्यात गर्न थालेको भन्ने विभिन्न सञ्चार माध्यमहरुबाट प्राप्त समाचार प्रति यस संघको गम्भिर ध्यानाकर्षण भएको छ ।

 नेपाल विद्यूत प्राधिकरणले विगत केहि महिना देखि स्वदेशी उद्योगहरुको आवश्यकता अनुरुप विद्यूत आपूर्ति गर्न नसकिरहेको तथा उद्योग संचालन अवरुद्ध हुने गरी अघोषित तवरले दिनहुँ १२ घण्टा सम्मको लोडसेडिङ गरिरहेकोमा गत सोमबार देखि प्राधिकरणले ४०० मेघावाट विद्यूत भारत निर्यात गरिरहेको भन्ने समाचार आश्चर्यजनक छ ।

विद्यूत आपूर्ति अभावमा एकातर्फ स्वदेशी उद्योगहरु पूर्ण रुपमा संचालन हुन नसकिरहेको, स्वदेशी उत्पादकत्वमा ह«ास आएको तथा उत्पादित वस्तुहरुको अभावमा महंगी बढेको अवस्था छ भने अर्को तर्फ सरकार स्वदेशी उद्योगहरुको हकहित, संरक्षण एवं सम्वद्र्धनका निमित्त विभिन्न नीतिहरु र संयन्त्रहरु अपनाउन प्रयत्नशील रहेको छ ।

 तथापी, स्वदेशी उद्योगहरुलाई आवश्यकता अनुरुपको विद्यूत आपूर्ति नगरी तथा अघोषित लोडसेडिङको मारमा राखी नेपाल विद्युत प्राधिकरणले ‘आन्तरिक खपत पश्चात् बचत भएका विद्यूत भारत निर्यात गर्न थालेको’ भन्ने भ्रमपूर्ण जानकारी दिनुबाट प्राधिकरणले स्वदेशी उद्योगहरु प्रति अन्याय गरेको देखिन्छ ।

 अतः मुलुकको उत्पादकत्व एवं आत्मनिर्भरता अभिवृद्धि तथा स्वदेशी उद्योगहरुको संरक्षणार्थ नेपाल सरकार, नेपाल विद्युत प्राधिकरण लगायत सम्बन्धित सबै निकायहरु समक्ष विद्यूतको स्वदेशी खपत तथा आवश्यकता परिपूर्तिमा विशेष ध्यान दिएर मात्र बाँकी रहेको विद्यूतको निर्यात गर्न जोडदार अपिल गर्दछौँ ।