कोशी प्रदेशमा अब एमालेको नेतृत्वमा सरकार बन्ने दाबी

श्याम राई, उदयपुर गाईघाट, १३ चैत्र | नेकपा एमालेका बरिष्ठ उपाध्यक्ष ईश्वर पोखरेलले कोशी प्रदेशमा अब एमालेको नेतृत्वमा सरकार बन्ने दाबी गरेका छन् । केन्द्रमा भएको गठबन्धन फेरबदलले अब सातै वटा प्रदेशमा सरकार परिवर्तन हुने र कोशीमा सरकारको नेतृत्व एमालेले लिने उनले बताए ।

नेकपा एमाले उदयपुरको ९ औं जिल्ला अधिबेशन उद्घाटनका लागि आईपुगेको पोखरेलले प्रेस चौतारी उदयपुरले मंगलबार आयोजना गरेको पत्रकार भेटघाट कार्यक्रममा आगामी २०८४ को निर्वाचनमा एमाले कसैसँग गठबन्धन नगरी चुनावी मैदानमा एक्लै उत्रने र एकमना सरकार बनाउने बताए । 

उनले एउटा गठबन्धन भत्किएर अर्को बनेको अहिलेको परिस्थितिमा अब अर्को गठबन्धन बन्न नसक्ने बताए । उपाध्यक्ष पोखरेलले अहिलेको परिस्थितिमा बाम गठबन्धन र समाजबादी मोर्चामा सहभागी हुन एमालेले कुनै योजना नबनाएको बताए । हिजो एमाले सिध्याउने तयारीमा कांग्रेस सहितको गठबन्धन लागेकोले त्यसलाई जसरी भएपनि भत्काउने योजना अनुरुप गठबन्धन तोडेको उनले बताए ।