मेयर कोइरालालाई ब्रतालुले भने– नहर सफा गरिदिएकोमा धन्यवाद

विराटनगर ÷ छठ पर्वलाई ध्यानमा राखेर विराटनगर महानगरपालिकाले नहर र खोला सरसफाई गरेर व्यवस्थित गरेको भन्दै ब्रतालुहरुले खुसी व्यक्त गरेका छन् ।

छठ पूजाको अवलोकन गर्न पिचरा नहर र सिंघिया खोलाका विभिन्न पूजास्थलमा पुग्नुभएका विराटनगर महानगरपालिकाका मेयर नागेश कोइरालालाई ब्रतालुहरुले खुसी व्यक्त गर्दै धन्यवादसमेत दिएका छन् । विगतमा भन्दा नहरको पानीसमेत सफा नभएको उनीहरुको प्रतिक्रिया थियो । विराटनगरका युवा समाजसेवी गणेश साहले महानगरले सरसफाईमा विशेष ध्यान दिएको बताउनुभयो । साहले नहरको छेउछाउको बाटोमा गिट्टी लगाइदिएका कारण हिंड्नसमेत सहज भएको उल्लेख गर्नुभयो । महानगरको समन्वयमा एक हप्ताअघि नै नहरको सरसफाई गरिएको थियो ।

महानगरले नहरको विशेष सरसफाईसँगै डिलमा गिट्टी विछ्याएर आवतजावतमा सहज बनाएको थियो । सो क्रममा मेयर कोइरालाले महानगरपालिका विराटनगरवासीको साथमा सधैं रहेको बताउनुभएको थियो । उहाँले राष्ट्रिय एकता सुदृढ गर्न, आपसी विश्वास र सम्बन्ध थप प्रगाढ तुल्याउन तथा देशमा विद्यमान चुनौतीहरूमाथि विजय हासिल गर्न छठ पर्वले प्रेरणा प्रदान गरोस् भन्दै शुभकामनासमेत दिनुभयो ।