.gif)
विराटनगर ÷ धरानलगायतका विभिन्न स्थानमा डेंगु रोगको संक्रमण फैलिएपछि विराटनगर महानगरपालिकाले डेंगुको संक्रमण रोकथाम र नियन्त्रणका लागि तयारीलाई तीव्र पारेको छ ।
डेंगु रोकथाम र नियन्त्रणका उपायका विषयमा महानगरले आज सफाई शाखाका कर्मचारीहरुका लागि अभिमुखीकरण कार्यक्रम सञ्चालन गरेको छ । यसअघि महानगरले जनप्रतिनिधि, स्वास्थ्यकर्मी, कर्मचारीसहित विभिन्न संघसंस्थाका प्रतिनिधिहरुलाई राखेर अभिमुखीकरण कार्यक्रम सञ्चालन गरेको थियो । सफाई कर्मचारीहरुलाई डेंगु रोगको स्रोत, रोकथाम र नियन्त्रणका उपायका विषयमा स्वास्थ्य महाशाखा प्रमुख हैदर अलीले जानकारी गराउनुभएको थियो । सरफाई गर्ने क्रममा टायर, बाल्टिन, ड्रमलगायतमा पानी जमेको पाइए तत्काल हटाउनुपर्ने उहाँले बताउनुभयो ।
डेंगु नियन्त्रण औषधि छर्केर भन्दा घरभित्र र घर वरिपरि पानी जम्न नदिएर नियन्त्रण गर्न सकिने उहाँको भनाइ थियो । फ्रिज, कुलर, गमला, टायरलगायतमा लामो समयदेखि जमेको पानीमा डेंगु सार्ने लामखुट्टे उत्पादन हुने भएकाले सरसफाईबाटै डेंगु नियन्त्रण र रोकथाम गर्न सकिने हैदरले स्पष्ट पार्नुभयो । अभिमुखीकरण कार्यक्रममा महानगरका प्रमुख प्रशासकीय अधिकृत राजेन्द्र पराजुलीले आफ्नो घर वरिपरिमात्रै सफा गरेर डेंगुको संक्रमणबाट बच्न नसकिने बताउनुभयो । उहाँले छरछिमेकीको घरमा पानी जमेको पाइएमा त्यसबाट समेत डेंगु फैलिने दाबी गर्नुभयो । यदि छिमेकीको घरमा पानी जमेको देखेमा हटाउन लगाउनुपर्नेमा जोड दिनुभयो । “आफ्नो घर सरसफाई गरेर मात्रै हुँदैन,” पराजुलीले भन्नुभयो, “छरछिमेकीको घरमा जमेको पानीबाट समेत डेंगु सर्न सक्छ ।”
शुक्रबार महानगरले १९ वटै वडामा बिहान ७ देखि ९ बजेसम्म डेंगु सार्ने लार्भा खोज्ने र नष्ट गर्ने अभियान सञ्चालन गर्दैछ । अभियानमा सरिक हुन सरसफाई कर्मचारीहरुलाई उहाँले आग्रह गर्नुभयो । अभिमुखीकरण कार्यक्रममा सामान्य प्रशासन महाशाखा प्रमुख अर्जुन थपलिया, मेयर नागेश कोइरालाका स्वकीय सचिव डिकप्रसाद घिमिरे, उपमेयर शिल्पा निराला कार्कीका स्वकीय सचिव निश्चल मायालु, सफाई शाखाका किरण न्यौपानेलगायतको उपस्थिति रहेको थियो ।
यसअघि बिहीबार कार्यबाहक मेयर शिल्पा निराला कार्कीको उपस्थितिमा सबै वडाका जनप्रतिनिधि, वडासचिव, स्वास्थ्यकर्मीलगायतका लागि महानगरले एकदिने अभिमुखीकरण सञ्चालन गरेको थियो ।
Post a Comment