क्यानडा विश्वकपमा छनोट भयो

काठमाण्डौ चैत १४ गते । रातो तारा डट कम,क्यानडा ३६ वर्ष पछि विश्वकप फुटबलमा छनोट भएको छ । कतारमा आयोजना हुने फिफा विश्वकप फुटबल छनोट अन्तर्गत गयराति जमैकालाई ४–० गोल अन्तरले हराउँदै क्यानडा विश्वकपमा छनोट भएको हो । यस अघि क्यानडाले सन् १९८६ मा विश्वकप खेलेको थियो । खेलको १३ औं मिनेटमा केली लारिनले गोल गर्दै क्यानडालाई सुरुआती अग्रता दिलाउनुभएको थियो । त्यसपछि टाजोन बुचानन र जुनियर होइलेटले गोल गरेपछि क्यानडाको अगता तेब्बर बन्यो । खेलको ८८ औं मिनेटमा जमैकाका एड्रियन मारिप्पाले आत्मघाती गोल गरेपछि क्यानडा ४–० ले विजयी भयो । जितसँगै कोन्काफ क्षेत्रको छनोटमा क्यानडा १३ खेलमा २८ अङ्क जोडेर शीर्ष स्थानमा रहेको छ । जमैका भने ८ अङ्क जोडेर सातौं स्थानमा रहेको छ ।