.gif)
विराटनगर, १७ माघ। रातो तारा डट कम, ब्याडमिन्टनका स्टार प्रिन्स दाहाललाई विराटनगर १२ मा रहेको बन्जरा एग्रोले वार्षिक १० लाख र विदेश जाने आउने २ वटा टिकट दिएर ब्राण्ड एम्बेस्डर बनाएको छ ।
बञ्जरा एग्रो प्रा.लि.को कार्यालयमै सोमबार आयोजित एक कार्यक्रमबीच जुनियर ब्याडमिन्टन वल्र्ड च्याम्पियन प्रिन्स दाहाल र एग्रोको तर्फबाट संचालक संजय चापागाईंले सम्झौता पत्रमा हस्ताक्षर गरेका छन् ।
सम्झौता भएसँगै अब प्रिन्स दाहालले खेल्ने जुनसुकै प्रतियोगितामा लगाउने टिसर्टको अगाडि दाहिनेपट्टिको छातिमा बञ्जरा एग्रोको लोगो हुनेछ । यस्तै बन्जरा एग्रोले उत्पादन गरेका कृषिजन्य वस्तुमा प्रिन्सको फोटो टाँसिने छ ।
सम्झौता गर्ने कार्यक्रममा राष्ट्रिय खेलकुद परिषदका बोर्ड सदस्य तथा नेपाल ब्याडमिन्टन संघका उपाध्यक्ष सुवास श्रेष्ठ, ब्याडमिन्टनका अन्तराष्ट्रिय बरिष्ठ एम्पायर उदय अर्याल, ब्याडमिन्टन खेल नेपालका प्रमुख प्रशिक्षक सुदिप योञ्जन, प्रिन्सका मेनेजर तथा खेतान स्पोर्टस फाउन्डेसनका सिइओ विकास खेतान, अपि स्पोर्टस इभेन्ट म्यानेजमेन्ट कम्पनीका सिइओ कमलेश निरौलालगायतको उपस्थिति थियो ।
कार्यक्रममा बोल्दै राखेपको बोर्ड सदस्य सुवास श्रेष्ठले प्रिन्स दाहाललाई २०२४ हुने ओलम्पिकमा जसरी पनि सहभागी गराउने बताए । उनले अहिलेसम्म प्रिन्सले आफ्नै प्रयासमा इतिहास रचेको भन्दै खेलकुद परिषदको तर्फबाट उनलाई अबका अन्तर्राष्ट्रिय खेलमा सहभागी गराउन सबै खालको सहयोग गर्ने बताए । यस्तै ब्याडमिन्टनका अन्तर्राष्ट्रिय उम्पायर अर्यालले कृषि क्षेत्रबाट खेलकुदको क्षेत्रमा भएको यो अत्यन्तै ठूलो सहयोग भन्दै बञ्जरा एग्रोलाई धन्यवाद दिए ।
कार्यक्रममा बोल्दै बञ्जरा एग्रोका संचालक संजय चापागाईंले आफूहरुले खेल क्षेत्रमा र त्यसमा पनि ब्याडमिन्टनलाई नै रोज्नुको कारणबारे प्रष्ट पारेका थिए । कार्यक्रमको अवसरमा दाहाल र अर्याललाई बञ्जरा एग्रोले सम्मानसमेत गरेको थियो ।
बञ्जरा एग्रो विराटनगरकै गजेन्द्र शर्मा बञ्जरा तथा चापागाईंको संयुक्त लगानीमा विराटनगरमा स्थापना गरिएको कृषि फार्म हो । गजेन्द्र शर्मा हाल चीनको राजधानी बेइजिङमा बस्छन् । हालसम्म ८ करोडभन्दा बढी लगानी भएको एग्रोले पशुपालन, कृषि, दूध तथा दुग्धजन्य पदार्थको उत्पादनमा जोड दिने जनाएको छ ।
को हुन् प्रिन्स दाहाल ?
नेपाली ब्याडमिन्टन स्टार प्रिन्स दाहाल जुनियर विश्व ब्याडमिन्टन वरीयताको शीर्ष स्थानमा पुग्दै इतिहास रच्ने नेपालका पहिलो खेलाडी हुन् दाहाल । विश्व ब्याडमिन्टन फेडेरेसनले जारी गर्ने वार्षिक वरियतामा सिंगलतर्फ उनी पहिलो नम्बरमा छन् । ओलम्पिक मान्यता प्राप्त खेलमा नेपाली खेलाडी विश्व वरियताको शीर्ष स्थानमा पुगेको यो पहिलो हो ।
मान्यता प्राप्त प्रतियोगिताहरूको प्रदर्शनका आधारमा फेडेरेसनले हरेक साता जारी गर्ने विश्व वरीयता यसपल्ट एक वर्षपछि सार्वजनिक गरेको हो । कोरोना महामारीका कारण अन्तर्राष्ट्रिय प्रतियोगिता नभएकाले नियमित वरीयता सार्वजनिक गर्न ढिला भएको थियो । अघिल्लो वर्ष प्रिन्स तेस्रो स्थानमा थिए ।
फेडेरेसनले गत पुसमा सार्वजनिक गरेको विश्व वरीयतामा प्रिन्स १० हजार ४ सय अंकका साथ शीर्ष स्थानमा परेका हुन् । कोरोना महामारी सुरु भएयता कुनै पनि अन्तर्राष्ट्रिय प्रतियोगिता खेल्न नपाएका प्रिन्सको वरीयता अंक भने सुधार हुन सकेको छैन ।
विश्व ब्याडमिन्टन वा ब्याडमिन्टनको महादेशीय फेडेरेसनबाट मान्यता पाएका च्यालेन्ज कप र इन्टरनेसनल सिरिजमा गरेको प्रदर्शनका आधारमा वरीयता निर्धारण हुने गर्छ । पहिलो चरणबाटै बाहिरिएबाहेक हरेक चरणको निश्चित अंकका आधारमा प्रिन्सको १० हजार ४ सय अंक पुगेको हो ।
विश्व वरीयतामा शीर्ष स्थानमा पुगेसँगै प्रिन्सले यसलाई कायम राख्न सकेमा आसन्न जुनियर विश्व च्याम्पियनसिपमा आकर्षणको केन्द्र बन्नेछन् । यो प्रतियोगिता अघिल्लो वर्षको फेब्रुअरीमै आयोजना हुने तालिका भए पनि कोभिडका कारण स्थगित भएको छ ।
Post a Comment