३८ औं मगर एकता दिवस

काठमाण्डौ फागुन ६ गते । रातो तारा डट कम,उपराष्ट्रपति नन्दबहादुर पुनले अबको ध्यान विकास र आर्थिक समृद्धितर्फ केन्द्रीत हुनुपर्ने बताउनुभएको छ । ‘समृद्ध नेपाल, सुखी नेपाली’ निर्माणका लागि सबैको ध्यान विकास र आर्थिक समृद्धिसँग जोडिनु आवश्यक रहेको उपराष्ट्रपति पुनले बताउनुभयो । 

नेपाल मगर संघ स्याङ्जाको आयोजना र नेपाल मगर संघ वालिङको ब्यवस्थापनमा वालिङमा आयोजित ३८ औं मगर एकता दिवस तथा मगर गुमष्ठा इम (मगर भवन) को उद्घाटन गर्दै उपराष्ट्रपति पुनले समृद्धिको एउटै शत्रु भ्रष्टाचार, अनियमितता र ढिलासुस्तीलाई जरैपाई फाल्नुपर्ने बताउनुभएको हो ।

मगर समुदाय संघर्ष गर्न सक्ने बीरताले भरिएको ईमान्दार र कर्तब्यनिष्ठ समुदाय भएको बताउँदै उपराष्ट्रपति पुनले अब मगर समुदाय राजनीतिक संघर्षसँगै आर्थिक समृद्धितर्फ जोडिन आग्रह गर्नुभयो । पुनले मातृभाषाको संरक्षण गर्नु राज्यको दायित्व भएको बताउँदै मातृभाषा पठन पाठनको ब्यवस्था मिलाउन पनि आग्रह गर्नु

भयो । 

कार्यक्रममा नेपाल कम्युनिष्ट पार्टी स्याङ्जाका अध्यक्ष सूर्यप्रसाद गैह्रे, वालिङ नगर प्रमुख दिलिपप्रताप खाँण, नेपाल मगर संघ पूर्व केन्द्रीय उपाध्यक्ष रीना राना लगायतले मगर भाषा, कला, संस्कृतिको संरक्षणमा सबै मगर समुदाय एकजुट भएका लाग्नुपर्नेमा जोड दिनुभयो ।