मनाङ मस्र्याङ्दी क्लबले सहिद स्मारक ए डिभिजन लिग फुटबलमा सान्दार जित हात पार्यो

काठमाण्डौ माघ १५ गते । रातो तारा डट कम,साविक विजेता मनाङ मस्र्याङ्दी क्लबले सहिद स्मारक ए डिभिजन लिग फुटबलमा सहज जित निकालेको छ । एन्फा कम्ल्पेक्स सातदोबाटोमा आज भएको खेलमा मनाङले साविक उपविजेता संकटा क्लबलाई ३–० गोल अन्तरले पराजित गरेको हो । मनाङको जितमा अन्जन बिष्ट र निशान लिम्बुले एक एक गोल गर्नुभयो । मनाङले एक गोल आत्मघाती उपहार पाएको थियो । खेलको ४२ औं मिनेटमा अमित तामाङको आत्मघाती गोलबाट मनाङले सुरुवाती अग्रता बनाएको थियो । अन्जनको हेड बल क्लियर गर्ने क्रममा अमितले आफ्नै पोस्टमा गोल गर्नुभएको थियो । त्यसको एक मिनेट नबित्दै ४३औं मिनेटमा अन्जनले गोल गर्दै मनाङलाई २–० को अग्रता दिलाउनुभयो । त्यसपछि खेलको ७१ औं मिनेटमा निशानले डिबक्स नजिकैबाट उत्कृष्ट गोल गर्दै मनाङलाई ३–० को सहज जित दिलाउनुभएको हो ।