नेपालले कुवेतलाई ३० रनले पराजित गर्योे

काठमाण्डौं,फागुन १६ गते । रातो तारा डट कम,थाईल्याण्डमा जारी आईसीसी महिला विश्वकप क्रिकेट अन्तर्गत एसिया छनोटको अन्तिम खेलमा नेपालले कुवेतलाई पराजित गरेको छ । हिजो भएको खेलमा नेपालले कुवेतलाई ३० रनले हराएको हो ।

बैंकक स्थित एसियन ईन्सिच्युट अफ टेक्नोलोजीको मैदानमा नेपालले दिएको १ सय १७ रनको लक्ष्य सहित जवाफी ब्याटिङ गरेको कुवेतले २० ओभरमा ९ विकेट गुमाएर ८६ रन मात्र बनाउन सक्यो ।

कुवेतलाई सस्तैमा समेट्न कप्तान रुबिना क्षेत्रीले ह्याट्रिक विकेट लिनुभयो । रुबिनाले अन्तिम ओभरको अन्तिम ३ बलमा लगातार विकेट लिनुभएको थियो ।

कुवेतलाई अन्तिम ओभरमा ३५ रन चाहिएको अवस्थामा बलिङ गर्नुभएका रुबिनाले पहिलो ३ बलमा एक वाईड सहित चार रन खर्चनुभयो । त्यसपछिको बलमा भने रुबिनाले लगातार विकेट लिनुभएको थियो ।