कोशी प्रदेशका उद्योग, कृषि तथा सहकारी मन्त्रीद्वारा-संघको ३५औँ कार्यसमितिलाई स्वागत तथा शुभकामना व्यक्त

बिराटनगर २०८३ असोज ९ गते । कोशी प्रदेश सरकारका उद्योग, कृषि तथा सहकारी मन्त्री माननीय राम प्रसाद महतोज्यूले हिजो मोरङ उद्योग व्यापार संघको नवनिर्वाचित ३५औँ कार्यसमितिलाई स्वागत तथा बधाई ज्ञापन गर्न मन्त्रालयमा शुभकामना आदान–प्रदान कार्यक्रमको आयोजना गर्नु भएको छ ।

कार्यक्रममा माननीय मन्त्रीज्यूले संघको नयाँ नेतृत्वलाई बधाई ज्ञापन गर्दै सफल कार्यकालको शुभकामना व्यक्त गर्नु भएको थियो । साथै उहाँले कोशी प्रदेशमा उद्योग–व्यवसाय तथा स्वदेशी उत्पादनको प्रवद्र्धन, बजारीकरण तथा संरक्षणका लागि प्रदेश सरकार पूर्ण रुपमा कटिबद्ध रहेको बताउनु भई प्रदेशमा आर्थिक समृद्धि हासिल गर्न मोरङ उद्योग व्यापार संघसँगको सहकार्यमा कृषि र उद्यमशीलता क्षेत्रका साथै निजी क्षेत्रका संघ–संस्थाहरुसँग हातेमालो गर्ने कार्यहरु अघि बढाउने प्रतिबद्धता व्यक्त गर्नु भएको थियो ।

सो अवसरमा संघका अध्यक्ष अनिल कुमार साहले प्रदेश सरकार तथा मन्त्रालयले देखाएको सम्मान र शुभेच्छाप्रति आभार प्रकट गर्दै क्षेत्रको उद्योग–व्यवसायको संरक्षण, प्रवद्र्धन र समग्र आर्थिक समृद्धिका लागि संघ निरन्तर सहकार्य गर्न तत्पर रहेको धारणा व्यक्त गर्नु भएको थियो ।

उक्त स्वागत तथा शुभकामना कार्यक्रममा संघका अध्यक्ष अनिल कुमार साह सहित संघका पदाधिकारीहरु, कार्यसमिति सदस्यहरु, आमन्त्रित सदस्यहरु, महिला उद्यम समिति र युवा उद्यम समितिका संयोजकद्वय लगायतको उपस्थिति रहेको थियो ।