विद्यार्थीलाई न्यानो कपडा र शैक्षिक सामग्री वितरण

विरानगर  मंसिर ८  गते । लायन्स क्लब अफ विराटनगर शुभम्ले धनकुटाको एउटा सामुदायिक विद्यालयका विद्यार्थीलाई  न्यानो कपडासहितका सामग्री वितरण गरेको छ ।

अन्तर्राष्ट्रिय बाल दिवसको अवसर पारेर धनकुटाको टेकुनालास्थित श्री  जनता राष्ट्रिय आधारभूत विद्यालयका विद्यार्थीलाई न्यानो कपडा, ट्राकसुट, स्टेशनरी सामग्री, भलिबल, लुँडो, क्यारामबोर्ड, चेकलगायतका सामग्री वितरण गरिएको क्लबले जनाएको छ । विद्यालयमा अध्ययनरत ५२ जनालाई उक्त सामग्री हस्तान्तरण गरिएको थियो ।

क्लबकी अध्यक्ष विन्दु श्रेष्ठ लाखेको अध्यक्षतामा भएको कार्यक्रममा लायन्स क्लब अफ विराटनगर शुभम आबद्ध पदाधिकारी र सदस्यहरुको सहभागिता रहेको थियो । क्लबले यसअघि पनि विभिन्न विद्यालयका विद्यार्थीलाई शैक्षिक सामग्री, न्यानो कपडा, खेलकुद सामग्री वितरण गरेको थियो ।