खोकनावासी र प्रहरीबीच झडप हुदाँ प्रहरीले सात राउन्ड अश्रु ग्यास हान्यो–चार जना प्रहरी घाइते

काठमाण्डौ असार २० गते । रातो तारा डट कम,ललितपुरको खोकनावासी र प्रहरीबीच आज दिउँसो झडप हुदाँ चार जना प्रहरी घाइते भएका छन् । खुडोल फाँटमा रोपाइँ गर्न गएका स्थानीयलाई प्रहरीले अवरोध गर्न खोजेपछि झडप भएकोहो ।

प्रहरीले स्थितिलाई नियन्त्रणमा लिनका लागि सात राउन्ड अश्रु ग्यास समेत प्रहार गरेको छ । झडपपछि अहिले खुडोल फाँटमा स्थानीयले पुनः धान रोपेका छन् भने त्यस क्षेत्रमा प्रहरीको बाक्लो उपस्थिति छ । यो फाँट काठमाडौं–तराई जोड्ने द्रुतमार्गको शुन्य किलोमिटर हो ।

 त्यस क्षेत्रको जग्गा सरकारले अधिग्रहण गरेको छ । तर, स्थानीयले भने मुआब्जा लिइसकेका छैनन् । उनीहरुले सरोकारवालासँग छलफल नै नगरी एकलौटी ढंगबाट तयार गरेको मुआब्जा स्वीकार नभएको, द्रुत मार्गसँगै वाग्मती करिडोर, एक सय ३३ केभी प्रसारण लाइन, बाहिरी चक्रपथको विन्दु पनि खोकना फाँटमै पर्ने भएकाले मौलिक बस्तीको अस्तित्व सखाप हुने भन्दै विरोध जनाउँदै आएका छन् । यसअघि असार १५ गते पनि प्रहरी र स्थानीयवासी विवाद भएको थियो ।