प्रहरी आवास गृहको शिलन्यास

मोरङ, पौष ३० गते । रातो तारा डट कम,ईलाका प्रहरी कार्यालय रङगेलीको हाता भित्र निर्माण हुने प्रहरी आवास गृह तथा भान्सा घरको १ नम्बर प्रदेश प्रहरी प्रमुख प्रहरी नायव महानिरीक्षक केदार रिजालले आज एक कार्यक्रमका बिच शिलन्यास गर्नु भयो ।

नेपाल प्रहरीको नियमित बजेट अन्तरगत २ करोड ११ लाख ८२ हजार ६२५ मा निर्माण सम्पन्न गर्ने गरी ईलाका प्रहरी कार्यालय रङगेली र KM  ईन्जिनियर प्रालि काठमाण्डौ विच ठेक्का सम्झौता भई प्रहरी भान्सा घर तथा ब्यारेक भवन निर्माण हुन लागेको हो ।

आवास गृहको शिलन्यास पश्चात कार्यक्रमलाई सम्बोधन गर्नु हुँदै १ नम्बर प्रदेश प्रहरी प्रमुख प्रहरी नायव महानिरीक्षक केदार रिजालले सुरक्षित वासस्थानको ब्यबस्था भएसंगै प्रहरीले आमनागरीकलाई दिने सेवा पनि भरपर्दो हुनेमा आफु बिश्वस्त रहेको बताउनु भयो । कार्यक्रममा बिभिन्न वक्ताहरुले आ-आफ्नो धारणा राख्नुहुँदै आम नागरीकको सेवामा २४ सै घण्टा खटिने प्रहरीको उचित गास बासको ब्यबस्था भएमा मात्र उच्च मनोवलका साथ सेवा प्रदान हुने हुँदा प्रहरीको लागि सुबिधा सम्पन्न आवास तथा भान्सा घर निर्माणले स्थानीय स्तरको सुरक्षामा थप टेवा पुग्ने आफुहरुले बिश्वास लिएको बताउनु भएको थियो ।

कार्यक्रममा रङगेली नगरपालिका र सुनवर्सी नगरपालिका प्रमुखहरु, स्थानीय जनप्रतिनिधीहरु, बुद्धीजिवी, नागरीक समाजका अगुवाहरु, पत्रकार , स्थानीयवासीहरु लगायत ४०० भन्दा बढीको उपस्थीति रहेको थियो ।