अस्थायी शिक्षकहरु अव बिदाइ हुने

काठमाण्डौ बैशाख २६ गते । रातो तारा डट कम,सरकारले लामो समयसम्म कार्यरत् अस्थायी शिक्षकहरुलाई स्थायी गराउन नसकिने स्पस्ट पारेको छ । प्रतिनिधिसभा अन्तर्गत्को शिक्षा तथा स्वास्थ्य समितिको २५ गते सिंहदरबारमा बसेको बैठकमा शिक्षा, विज्ञान तथा प्रविधिमन्त्री गिरिराजमणि पोखरेलले अस्थायी शिक्षकहरुको स्वतः स्थायी बनाउनुपर्ने माग सम्बोधन गर्न नसकिने बताउनुभयो । उहाँले एकपटक लिइएको परीक्षामा अनुत्तीर्ण भएका अस्थायी शिक्षकहरुलाई सरकारले चालू शैक्षिक सत्रभित्रै सम्मानका साथ बिदाइ गर्ने बताउनुभयो । सरकारले लामो समयसम्म कार्यरत् अस्थायी शिक्षकहरुलाई स्थायी गराउन एकपटक परीक्षा लिएको भन्दै अब पुनः परीक्षा लिएर स्थायी गराउन कानुनले नै नमिल्ने मन्त्री पोखरेलको तर्क छ । उहाँले सरकारले गुणस्तरीय शिक्षामा जोड दिइरहेका बेला परीक्षामा अनुत्तीर्ण भएका अस्थायी शिक्षकहरुलाई स्वतः स्थायी गर्न व्यावहारिक समेत नहुने बताउनुभयो । अस्थायी शिक्षकहरुलाई आर्थिक सहायता सहित बिदाइ गर्न सरकार लागिपरेको उहाँको भनाइ थियो ।