बसले कारलाई ठक्कर दिदा एकको मृत्यु,–सांसद वलीसहित १४ जना घाइते

{फायल फोटो}
काठमाण्डौं,माघ २५ गते । रातो तारा डट कम,दाङमा बसले कारलाई ठक्कर दिदा एकजनाको मृत्यु भएको छ । दुर्घटनामा प्रदेश नम्बर ५ का सांसद उत्तरकुमार वलीसहित १४ जना घाइते भएका छन् ।

घोराहीबाट लमहीतर्फ जाँदै गरेको ना ५ ख ५५२९ नम्बरको यात्रुबहाक बसले बुटवलबाट तुलसीपुरतर्फ आउँदै गरेको बा १८ च ६८३६ नम्बरको सांसद वली सवार कारलाई घोराही लमही सडक अन्र्तगत घोराही उपमहानगरपालिका वडा नम्वर ३ चिसापानी नजिकै ठक्कर दिंदा दुर्घटना भएको हो । ईलाका प्रहरी कार्यालय लमहीका अनुसार मृत्यु हुनेमा बसमा सवार रुकुम घर भएका २७ वर्षिया रमिता शर्मा रहनुभएको छ ।

दुर्घटनामा परि सांसद वलीको टाउको र खुट्टामा चोट लागेको र थप उपचारका लागि कोहलपुर रेफर गरिएको प्रहरीले जानकारी दिएको छ । अन्य घाइतेको लमही अस्पतालमा उपचार भइरहेको प्रहरीले जनाएको छ । कारमा दुईजना मात्रै रहेका र १३ जना बसमा सवार यात्रु घाइते भएका इलाका प्रहरी कार्यालयले जानकारी दिएको छ ।