राजधानी तोकिएकोमा धन्यवाद दिदै महानगरले भन्यो ब्यवस्थापिका र कार्यपालिका पनि नसार

विराटनगर बैशाख २६ गते । रातो तारा डट कम, विराटनगर महानगरपालिकाले विहिवार एक विज्ञप्ती निकाल्दै स्थायी राजधानी विराटनगर तोकेकोमा प्रदेश १ का सरकारलाई धन्यवाद दिएको छ । प्रदेश १ का  मुख्यमन्त्री,  मन्त्रीहरु तथा मन्त्रिपरिषद, सभामुख, उपसभामुख,  प्रदेश सभा सदस्यज्यूहरुप्रति धन्यवाद व्यक्त गरेको हो । 

यद्यपी नेपालकै औद्योगिक र राजनीतिक महत्व बोकेको विराटनगर प्रदेश १ को राजधानी तोकिएको यस क्षणमा व्यवस्थापिका तथा कार्यपालिका विराटनगर भन्दा अन्यत्रै सार्ने भन्ने किसिमका अभिब्यक्तिहरु सार्वजनिक भइरहेको प्रति विराटनगर महानगरको गम्भीर ध्यानाकर्षण भएको जनाएको छ ।  

स्थायी राजधानि विराटनगरबाट बृहतविराट क्षेत्रका नाममा व्यवस्थापिका तथा कार्यपालिका अन्यत्रै सार्ने कार्यहुन गएमा विराटनगरवासीको समर्थन नरहने बताउदै राजधानीका लागि आवश्यक भौतिक पूर्वाधार निर्माणका लागि आवश्यक जग्गा उपलब्ध गराउन महानगर तयार रहेको मेयर भीम पराजुलीले बताउनु भयो । विराटक्षेत्रको विकास अवधारणा ल्याई प्रदेश सरकारले कतिपय संरचना अन्यत्रै सार्ने भन्ने प्रचार समेत हुनुले विराटनगरवासी सशंकित भएका छन् । 

यसका लागि विराटनगरका राजनैतिक दल, संघीय सरकार र प्रदेश सरकारमा जितेर नेतृत्व लिइरहेका सांसदहरु, स्थानीय जनप्रतिनिधि, आम विराटनगरवासी तथा शुभचिन्तकलाई खबरदारी गर्न समेत महानगरले अपिल गरेको छ ।  यसका साथै प्रदेश नं.१ को राजधानी विराटनगरमा व्यवस्थापिका तथा कार्यपालिका कायम गर्न र विराटनगर महानगर क्षेत्र भन्दा बाहिर नसार्न सम्पूर्ण महानगरवासीको तर्फबाट प्रदेश सरकारलाई ध्यानाकर्षण गराउदै महानगरपालिका भित्र रहेको जग्गा प्रदेश सरकारको माग बमोजिम दिने कुरामा प्रतिबद्ध रहेको  स्मरण गराएको विज्ञप्तीमा उल्लेख छ ।